منبر البترا
كتابات واعدة

قواعد “مش شغلك” الأربعون

منبر البترا-بقلم: رغده خليل

:‬ 1. مش شغلك شو حط أي بني ادم صورة لبروفايله.

2. مش شغلك شو كتب ع صورته لما نزلها.

3. مش شغلك شو كتب فلان لقب قبل اسمه.

4. مش شغلك لو صوّر فلان حاله وهو بغني.

5. مش شغلك لو فلان طول على الفيس بوك.

6. مش شغلك لو فلان تصوّر بفلتر الكلب أو الورد.

7. مش شغلك لو فلان بصوّر كل اشي بياكله وبنزله.

8. مش شغلك لو فلان بتغزّل بشريكه ٢٤ ساعة عمواقع التواصل.

9. مش شغلك لو فلانة اتحجبت او شلحت الحجاب.

10. مش شغلك لو فلان نشر ادعية وآيات ع مواقع التواصل وبعدها بدقيقة مقاطع موسيقى.

11. مش شغلك لو فلان ٢٤ ساعة مكتئب ع مواقع التواصل.

12. مش شغلك لو علّان ٢٤ ساعة تافه وبنكّت ع مواقع التواصل.

13. مش شغلك أي ساعة فلان روح عالبيت.

14. مش شغلك فلان ٢٤ ساعة بحكي سياسة ع صفحاته الشخصية.

15. مش شغلك فلان ولا فلانة اتصور مع زميله ونزّل صورته.

16. مش شغلك فلان خطب أو تزوج أو ليش ما اتزوج لهسا.

17.مش شغلك فلان وإلا فلانه خلف أو خلفت وإلا لسه وليش خلف أو خلفت أو ليش لسه!

18. مش شغلك شفت فلان ولا فلانة مع زملائهم بمكان عام وكيف وليش طالعين مع بعض.

19. مش شغلك فلان ولا فلانة حطوا قلوب حب بالتعليقات لزملائهم على مواقع التواصل وإلا ضحكوا وإلا حطوا ههههه.

20. مش شغلك ليش فلانة ٢٤ ساعة بتتغزل بأبوها ولا جوزها ولا خطيبها وإلا فلان 24 ساعة بتغزل بمرته.

21. مش شغلك فلانة بتدخن ولا بتأرجل وإلا ما بتطيق الدخان.

22. مش شغلك فلانة لبست قصير ولا طويل وإلا غامق وإلا فاتح.

23. مش شغلك فلان ولا فلانة اتخرجت بعد ٦٣٧٣٧٣ سنين من الجامعة.

24. مش شغلك فلان ولا فلانة درسوا عشرين سنة بتخصص واشتغلوا اخر اشي بتخصص ثاني.

25. مش شغلك فلان ولا فلانة بشكوا الحال ومضايقين غالبًا أو مبسوطين أربعة وعشرين ساعة!

26. مش شغلك فلان ولا فلانة بحكوا عن الهجرة ٢٤ ساعة.

27. مش شغلك فلان ولا فلانة بضلهم يتذكروا امهم المتوفية او ابوهم المتوفي ٢٤ ساعة.

28. مش شغلك قديش راتب اي حدا.

29. مش شغلك وين فلان بصرف راتبه وليش؟

30. مش شغلك اذا فلان ولا فلان بشكي من شغله ٢٤ ساعة.

31. مش شغلك فلان ولا فلانة بصلوا وبصوموا او بزكوا.

32. مش شغلك اذا فلانة حاطة فل ميكب اب كل يوم أو ما بتحب تحط ميكب.

33. مش شغلك فلان وضعه فوق الريح وعمل عمرة او تصدّق ولا لا.

34. مش شغلك اذا فلان اهتم بموضوع معين اكثر من موضوع ثاني (بقضية معينة اكثر من قضية ثانية ).

35. مش شغلك فلانة ولا فلان بسلموا عالجنس الاخر بالايد ولا بالرجل.

36. مش شغلك فلان بحب إمه ولا ابوه أكثر وليش وكيف وابصر شو في.

37. مش شغلك اذا فلان طلع دكتور واخوه بليط.

38. مش شغلك تجي تنتقد شخص معين قدام اخوه ولا اخته ولا صديقه المقرّب او اي حدا من معارفه.

39. مش شغلك تحكي رايك بكل اشي، ولو ما عندك اي خلفية باشي “اثبات وجود وبس”.

40. مش شغلك بكلّ ما سبق.. بس شغلك اذا اشي ما ارتحتله تلتزم الصمت او تنسحب او ما تشوف او تعمل بلوك او انك تتقبل الحالة كما هي، وشغلك تفهم انه مش كل اشي معرّض لأنه يستقبل رأيك أو تدخلك أو نقدك، وشغلك تعرف حدودك، وشغلك تعرف كيف تحترم وكيف تحكي، وكيف يكون اسلوبك. ملاحظة .. أنا مش ملاك ومحدش ملاك؛ ممكن اكون انتقدت او نمّيت او استغبت وكنت بموقف من اللي فوق، بس بعرف لمين وقدام مين احكي وكيف ومتى اسكت، وكيف ضروري احترم اللي قبالي…يعني مش شغلك تحاسب حدا خلقنا دعاة..ولم نخلق قضاة…!

Related posts

كيف نرتقي بمؤسساتنا الإعلامية؟

Nisreen Abdallah

كل عام والوطن بألف خير بقلم:أماني قاسم

Nisreen Abdallah

دامت البترا صَرحاً منيعاً

Nisreen Abdallah

اترك تعليقا

WP Facebook Auto Publish Powered By : XYZScripts.com